काठमाडौं । आन्दोलनमा सहभागी अमेरिकी नागरिकलाई सरकारले देश निकाला गर्ने निर्णय गरेको छ ।

गृह मन्त्रालयले अमेरिकी नागरिक ५८ वर्षीय जुलियन किर्पाललाई नेपाल प्रवेशमा दुई वर्ष प्रतिबन्ध लगाउने गरी डीपोर्ट गर्ने निर्णय गरेको स्रोतले जनाएको छ । उनलाई मंगलबार नेपालबाट डिपोर्ट गरेर पठाइनेछ ।

नेपालको राजनीतिक गतिविधिमा संलग्न भएको भेटिएपछि अमेरिकी नागरिक किर्पालविरुद्ध प्रतिबन्धसहितिको डीपोर्ट गर्ने निर्णय भएको छ ।

विदेशी नागरिक भएर उनी राजनीतिक गतिविधिमा संलग्न भएको भेटिएको छ । पक्राउ पर्दा पनि उनले कुलमान घिसिङको पक्षमा नाराबाजी गरेका थिए । कुनै पनि विदेशी नागरिकले नेपालको आन्तरिक मामिलामा दखल दिन मिल्दैन ।

चैत १४ गते अमेरिकी नागरिक किर्पाल माइतीघरबाट पक्राउ परेका थिए । उनले कुलमान घिसिङको पक्षमा नाराबाजी लगाउनुको साथै पम्पलेट पनि प्रदर्शन गरेका थिए ।

अमेरिकी नागरिक किर्पाल पर्यटक भिसामा नेपालमा बस्दै आएका थिए । पछिल्लो समय विभिन्न समूहहरूसँग निरन्तर उनी भेटघाटमा थिए ।