परराष्ट्रमन्त्री डा.राणा जेनेभा प्रस्थान गर्ने, उच्चस्तरीय सत्रलाई सम्बोधन गर्ने

काठमाडौं । परराष्ट्रमन्त्री डा.आरजु राणा संयुक्त राष्ट्रसंघीय मानवअधिकार परिषदको ५८औँ उच्चस्तरीय सत्रमा भाग लिन स्वीट्जरल्याण्डको जेनेभा प्रस्थान गर्न लागेकी छिन् ।

शनिबार परराष्ट्रमन्त्री डा.राणा जेनेभातर्फ प्रस्थान गर्नेछिन् । उच्चस्तरीय सत्र फागुन १२ देखि १४ गतेसम्म आयोजना हुनेछ । परराष्ट्रमन्त्री डा.राणाले फागुन १२ गते उच्चस्तरीय सत्रलाई सम्बोधन गर्ने कार्यक्रम छ ।

परराष्ट्रमन्त्री डा.राणाले संयुक्त राष्ट्रसंघीय मानवअधिकार परिषदको सन् २०२७ देखि २०२९ को कार्यकालका लागि नेपालको उम्मेदवारीमा संयुक्त राष्ट्रसंघका सदस्य राष्ट्रहरूबाट समर्थन जुटाउन पहल गर्नेछिन् ।

जेनेभामा उच्चस्तरीय सत्रमा परराष्ट्रमन्त्री डा.राणा सहभागी भइ फागुन १६ गते स्वदेश फर्कने कार्यक्रम रहेको परराष्ट्र मन्त्रालयले जनाएको छ ।

Published : Friday, 2025 February 21, 9:54 pm