पोखरा । पोखरामा जारी ३३औं औद्योगिक व्यापार मेला एवं आइटी महोत्सवमा–२०८१ मा ‘घुमौं मधेस, बुझौं मधेस’को प्रचार प्रसार गरिएको छ ।

पोखरामा आयोजित महोत्सवमा मधेस प्रदेशका पर्यटकीय, धार्मिक, सांस्कृतिक तथा खानपिन संस्कृतिको ब्यापक प्रचार गरिएको हो ।

माघ १० गतेदेखि जारी महोत्सवमा मधेस चिनाउने काम भइरहेको ‘घुमौं मधेस, बुझौं मधेस’का कार्यक्रम संयोजक विकास ठाकुरले बताएका छन् ।

संयोजक ठाकुरले भने, ‘यो महोत्सवमा स्टल राखेपछि पोखरावासीहरूले मधेस घुम्ने इच्छा व्यक्त गर्नु भएको छ ।’

उनले भने, ‘मधेसका ऐतिहासिक तथा सांस्कृतिक सम्पदाका बारेमा बुझाउने काम भइरहेको छ, धेरैजना उत्साहित हुनु भएको छ ।’

‘घुमौं मधेस, बुझौं मधेस’को स्टल नम्बर १ बाट मधेसमा रहेका धार्मिक, सांस्कृतिक, पर्यटकीय क्षेत्रवाट जानकारी दिइएको छभने स्टल नम्बर ४ बाट रौतहटको कटिया र बरमझियाको पेडाँको स्टल राखेर खानाको स्वाद पनि दिइरहेको संयोजक ठाकुरले बताए । चन्द्रपुर उघोग वाणिज्य संघका उदय सापकोटा सुरेनले स्टल व्यवस्थापन गरेका छन् ।

‘मधेसका बारेमा धेरै चासो व्यक्त गरेको देखिन्छ, धेरैले मदेश घुम्नु पर्नेमा जोड दिइरहेका छन् । यो हाम्रो लागि उपलब्धी हो ।’, सापकोटाले भने ।

मधेस प्रदेश सरकार, उधोग वाणिज्य तथा पर्यटन मन्त्रालयको कार्यक्रम ‘घुमौं मधेस बुझौं मधेस’ को स्टलमा हालसम्म हजारौं मानिसले अवलोकन गरेका छन् । आगुन्तकहरूलाई नेपाली र अंग्रेजी दुबै भाषामा प्रकाशित बुकलेट पनि बितरण गरिएको छ ।

महोत्सवको उदघाटन नै मिथिलाको झिंझिया र थारू नृत्युवाट सुरू भएकाले पनि पोखराले मधेसलाई महत्व दिएको संयोजक ठाकुरले बताए । ‘पोखरा महोत्सवको उदघाटनवाट नै जुन खालको मधेसको चिनारी गराउने कार्य भयो, यसले हिमालको काखमा रहेकाहरूलाई मधेसको समथर भूमिमा भ्रमण गर्न उत्साहित र प्रेरित गरेको छ ।’

त्यसो त गण्डकी प्रदेशका मुख्यमन्त्री सुरेन्द्रप्रसाद पाण्डेले पनि हिमाल, पहाड र मधेस जोडनका लागि यस्ता कार्यक्रमको बिशेष भूमिका रहनेसमेत जनाएका छन् । ‘हिमालका काखमा रहेकाहरू मधेसको समथर भूमिमा जानु पर्छ, मधेसका समथर भुमीमा रहेकाहरू हिमालको काखमा पुग्नु पर्छ, यसले दुवैतर्फका जनताले सांस्कृतिक तथा अन्य कुराहरू सिक्न र देख्न पाउने छन् ।’

मुख्यमन्त्री पाण्डेले सांस्कृतिक आदन प्रदानको कार्यक्रमहरू दुवैतर्फ गरिनु पर्नेमा पनि जोड गरेका छन् ।

दर्शकको चाप बढेपछि माघ १७ गतेसम्मका लागि भनिएको महोत्सव अब माघ १९ सम्म जारी रहने भएको छ ।