हेटौंडा । बाग्मती प्रदेशका मुख्यमन्त्री बहादुरसिंह लामाले नेतालाई गाली गरेर मात्र मुलुकको विकास नहुने बताएका छन् ।

बुधबार मकवानपुर उद्योग वाणिज्य संघको कार्यक्रममा लामाले नेपालको राजनीतिदेखि सबै क्षेत्रमा सुधार जरुरी रहेको बताए । उनले भने, ‘नेतालाई गाली गरेर मात्रै देशको विकास हुँदैन । सरकारले सुधार्नुपर्ने कुरा सुधारका लागि तयार छौं ।’

‘ठूलो कुरा गरेर मात्र हुँदैन, काम गर्नुपर्छ’, मुख्यमन्त्री लामाले भने, ‘सबै क्षेत्रमा रहेका व्यक्ति जिम्मेवार हुने हो भने मुलुकको विकास सम्भव छ ।’

उनले उद्योग क्षेत्र फस्टाएमा मात्र मुलुकमा रोजगारीको अवस्था सृजना हुनसक्ने बताए । नेपालमा लगानीमैत्री वातावरण बनाउन जरुरी रहेको लामाले बताएका छन् ।

उनले उत्पादनमूलक उद्योगलाई राज्यले समेत सहयोग गर्नुपर्ने बताएका छन् । ‘प्रदेशमा लगानीमैत्री वातावरण बनाउन लागिपरेका छौं । लगानी प्राधिकरण बनाएर लगानी भित्राउने योजनामा छौं’, उनले भनेका छन् ।