काठमाडौं । नेपाल विद्यार्थी संघ प्यूठान–काठमाडौं सम्पर्क समितिले लुम्बिनी प्रदेशका शहरी विकास तथा खानेपानीमन्त्री रोज राणालाई बधाईका साथै सम्मान गरेको छ ।

शनिबार काठमाडौंमा आयोजित कार्यक्रममा समितिले मन्त्री राणालाई सम्मानपत्र, खादामालासहित बधाई दिएको हो । नेविसंघका नेता कार्यकर्ताहरूले मन्त्री राणालाई बधाइ दिएका थिए । नेविसंघका नेता कार्यकर्ताहरू झण्डै ३० वर्षपछि प्यूठानमा नेपाली कांग्रेसको तर्फबाट राणाले विजयी हासिल गरेर मन्त्री बन्न सफल भएकोमा खुसी व्यक्त गरेका थिए ।

समितिका अध्यक्ष लवकुमार गतराजको अध्यक्षता तथा सचिव कवितारमण पुरीले सञ्चालन गरेको कार्यक्रममा मन्त्री राणालाई प्यूठान जिल्लाका साथै लुम्बिनीका १२ जिल्लाका जनताको माग सम्बोधन गर्न सुझाव दिइएको थियो ।

शहरी विकास तथा खानेपानीमन्त्री राणाले प्यूठानका जनताको इच्छाअनुसार काम गर्ने बताए । उनले लुम्बिनी प्रदेशका १२ जिल्लाको विकासमा पनि आफूले ध्यान दिनुपर्ने बताए ।

कार्यक्रममा नेपाली कांग्रेसका नेता खिमानसिंह रायमाझी लगायतका नेताहरूको उपस्थिति रहेको थियो । कार्यक्रममा प्यूठान जिल्लाबाट काठमाडौं उपत्यकामा आएर अध्ययनरत विद्यार्थीको ठूलो संख्यामा उपस्थिति रहेको थियो ।