काठमाडौं । नेपाली कांग्रेसले संसदीय छानविन समितिको माग गरेर प्रतिनिधिसभाको बैठक अबरुद्ध गरेको छ ।

शुक्रबार बसेको प्रतिनिधिसभाको बैठकलाई सभामुख देवराज घिमिरेले पेलेरै लैजान खोजेपछि कांग्रेसका सांसदहरू आ–आफ्नो सिटमा उभिएर अबरोध गरेका थिए । कांग्रेसले गृहमन्त्री रवि लामिछाने सहकारीको करोडौं रकम अपचलन तथा ठगी काण्डमा मुछिएपछि संसदीय छानविन समितिको माग राखेर सदन अवरुद्ध गरेको छ ।

सरकारले प्रमुख प्रतिपक्ष दल नेपाली कांग्रेसको मागलाई बेवास्ता गरेर जबरजस्ती संसदको बैठक चलाउन खोजेपछि कांग्रेसले सदन अबरोध गरेको जनाएको छ ।

एमालेबाट सभामुख बनेका घिमिरेले संसदको बैठकमा कांग्रेसलाई दमन गरेर चलाउन खोजेका छन् । घिमिरेले कांग्रेसले आकस्मिक समय माग गरेपछि ३ मिनट मात्रै दिएका थिए ।

कांग्रेसका सांसद गगनकुमार थापाले निगाहले दिएको समयमा आफू नबोल्ने भन्दै आपत्ति जनाएका थिए । उनले प्रमुख प्रतिपक्ष दलले समय माग गर्दा निगाहले समय दिएको भन्दै आक्रोश पोखेका छन् ।

बैठकमा कांग्रेसका सांसदहरूले सहकारी ठगलाई कारबाही गर भनेर नाराबाजी लगाएका छन् । कांग्रेसले सहकारी ठग भनेर नाराबाजी लगाएपछि गृहमन्त्री लामिछाने कालोनिलो बनेका थिए ।

कांग्रेसले अबरोध गरेपछि एमालेका अध्यक्ष समेत रहेका संसदीय दलका नेता केपी ओली बैठकबाट बाहिरिएका थिए ।

सभामुख घिमिरेले संसदको नियमित कामकारबाही अगाडि बढाउन खोजेपछि कांग्रेसका सांसदहरू रोष्टमको अगाडि पुगेर नारावाजी गरेका छन् । त्यसपछि सभामुख घिमिरेले संसदको बैठक १५ मिनटका लागि स्थगित गरेका छन् ।