काठमाडौं । नेपाली कांग्रेसका सभापति शेरबहादुर देउवासँग प्रधानमन्त्री समेत रहेका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले भेटवार्ता गरेका छन् ।

मंगलबार बिहान बालुवाटारमा देउवा र दाहालबीच भेटवार्ता भएको हो । दाहालसँगको भेटका लागि देउवा प्रमुख सचेतक रमेश लेखकलाई साथमा लिएर बालुवाटार गएका थिए ।

प्रमुख प्रतिपक्ष दल नेपाली कांग्रेसले सहकारीको करोडौं रकम अपचलन र ठगी प्रकरणमा मुछिएका गृहमन्त्री रवि लामिछानेबारे संसदीय छानविन समिति बनाउन माग गरेर संसद अबरोध गर्दै आएको छ ।

संसद खुलाउनका लागि प्रधानमन्त्री दाहालले सभापति देउवासँग आग्रह गरेको बुझिएको छ । सभापति देउवाले संसदीय छानविन समिति बनाउनेवित्तिकै संसदको अबरोध खुल्ने सन्देश सुनाएका छन् ।

गृहमन्त्री लामिछानेलाई सहकारीको करोडौं रकम ठगी काण्डमा बचाउन एमालेका अध्यक्ष केपी ओली र प्रधानमन्त्री दाहालले निकै ठूलो प्रयास गरेका छन् ।