प्यूठान । लुम्बिनी प्रदेशका उद्योग तथा यातायातमन्त्री राेज राणालाई गृहजिल्ला प्यूठानमा मतदाता, शुभेच्छुक र नेपाली कांग्रेस तथा नेपाल तरुण दलले भव्य स्वागत गरेका छन्

करिब ३१ वर्षपछि कांग्रेसबाट राणाले लुम्बिनी प्रदेश सभा सदस्यमा जितेका थिए । राणालाई कांग्रेसले मन्त्री बनाएर प्यूठानका जनताकाे सम्मान गरेकाे छ ।

साेमबार बिहान मन्त्री राणा प्यूठान गएका हुन् । राणालाई नेपाल तरुण दल प्यूठानले जिल्ला प्रवेश गर्ने सिमानादेखि नै स्कर्टिङ गरेको तरुण दलका जिल्ला अध्यक्ष कृष्ण बस्याल `राेयल´ले बताएका छन् ।

मन्त्री राणालाई तरुण दल, प्यूठान कांग्रेस, यातायात व्यवसायी, कर्मचारी लगायत स्थानीयहरूले स्वागत गरेका छन् ।

कार्यक्रमहरूमा मन्त्री राणाले प्यूठान जिल्लामा यातायात व्यवस्था कार्यालय स्थापना गर्ने बताएका छन् । उनले सकेसम्म लाइसेन्सकाे ट्रायलसहितकाे सेवा दिने कार्यालय स्थापना गर्न मन्त्रालयका कर्मचारीलाई निर्देशन दिएकाे बताए ।

कांग्रेसको कार्यक्रममा मन्त्री राणाले आफू मेलमिलापको नीतिसहित सबैलाई मिलाएर र मिलेर जाने बताए । उनले आफ्नो मन्त्रालयबाट हुने कामहरू तत्काल गर्ने बताएका छन् ।

कार्यक्रमहरूमा मन्त्री राणासंग जिल्लाबासीहरूले विभिन्न मागहरू पनि गरेका छन् । राणाले सकेसम्म मागहरू पूरा गर्ने बताएका छन् ।