काठमाडौं । जिल्ला प्रहरी कार्यालय धनुषाले स्रोत नखुलेको २० लाख ५० हजार नेपली रुपियाँसहित १ जना मानिसलाई पक्राउ गरेको छ ।

प्रहरीले शुक्रबार दिउँसो साढे १ बजे भारतबाट नेपाली रुपियाँ पैठारी गरी आफ्नो साथमा लुकाईछिपाई ओसार पसार गरी ल्याइरहेको सूचनाका आधारमा २० वर्षीय भारतीय नागरिक राजेश साहलाई पक्राउ गरेको जिल्ला प्रहरी कार्यालय धनुषाका प्रमुख (एसपी) विश्वराज खड्काले बताएका छन् ।

जनकपुरधाम उप–महानगरपालिका वडा नं. ४ स्थित सडकमा भारतको बिहार राज्य जिल्ला दरभंगा थाना सिंहवाडा गाउँ लहेरिया सराय बस्ने साहलाई पक्राउ गरिएको विज्ञप्तिमा उल्लेख छ ।

साहले लगाएको पाइन्टको अगाडिको दाहिने खल्तीभित्रबाट ९८०३४५२३५८ नम्बरको सिमकार्ड बरामद भएको छ ।

कालो रंगको झोलाभित्रबाट नेपाली रकम रू. १ हजार दरको नोट १८५० थान र रू.५ पाँच सय दरको नोट ४०० थान गरी जम्मा बीस लाख पच्चास हजार बरामद भएको छ ।

दशीसहित पक्राउ परेका साहलाई आवश्यक कारवाहीको लागि भन्सार कार्यालय जनकपुरमा पठाइएको छ ।