काठमाडौं । प्रहरीले कपिलवस्तुबाट छुरा प्रहार गरेर हत्या गरेको अभियोगमा २२ वर्षीय मोहन थारुलाई पक्राउ गरेको छ ।

मोहनले बाणगंगा नगरपालिका–६ मटेरिया बस्ने ७० वर्षीय बमबहादुर थारु र उनकी भतिजी १८ वर्षीया अञ्जनी थारुको हत्या गरेको विज्ञप्तिमा उल्लेख छ ।

रुपन्देहीको कंचन गाउँपालिका–२ बगही बस्ने मोहनलाई बिहीबार बिहान प्रहरीले पक्राउ गरेको हो ।

मोहनले उनीहरूकै घरमा गई चक्कु प्रहार गर्दा गम्भीर घाइते भएका बमबहादुरको सामुदायिक अस्पताल चार नम्बरमा उपचारको क्रममा मृत्यु भएको थियो ।

अञ्जनीको सोही अस्पताल हुँदै भैरहवा मेडिकल कलेजमा थप उपचारको क्रममा मृत्यु भएको प्रहरीले जनाएको छ ।

प्रहरीले प्रारम्भीक अनुसन्धानका क्रममा प्रेम सम्बन्ध र विवाह गर्न अस्वीकार गर्दा घटना भएको जनाएको छ । ‘अञ्जनी थारु र मोहन थारुबीच प्रेम सम्बन्धमा रहेको र अञ्जनी थारुले विवाह प्रस्ताव अस्वीकार गरेकोले चक्कु प्रहार गरेको भन्ने बुझिएको र निज चक्कु प्रहार गर्ने मोहन थारुलाई पक्राउ गरी अनुसन्धान कार्य भइरहेको छ’, विज्ञप्तिमा उल्लेख छ ।