राजेन्द्र श्रेष्ठ बानेश्वरबाट पक्राउ

काठमाडौं । नेपाल प्रहरीको केन्द्रीय अनुसन्धान विभाग (सीआईबी)ले फरार रहेका राजेन्द्रकुमार श्रेष्ठलाई पक्राउ गरेको छ ।

बैंकिङ कसूर मुद्दाका फरार प्रतिवादी काठमाडौं महानगरपालिका–१० बस्ने ४१ वर्षीय श्रेष्ठलाई शुक्रबार प्रहरीले पक्राउ गरेको सीआईबीले जनाएको छ ।

उच्च अदालत पाटनको २०७८ असोज १० गतेको फैसलाले ५ दिन कैद र २६ लाख रुपियाँ जरिवाना ठहर भई फरार रहेका उनलाई ब्यूरोबाट खटिएको प्रहरीले काठमाडौं बानेश्वरबाट पक्राउ गरेको हो ।

श्रेष्ठले आफ्नो खातामा पर्याप्त मौज्दात रकम नभएको भन्ने जानीजानी पीडितलाई झुक्यानमा पारी २०७६ कात्तिक २० गते सिभिल बैक लिमिटेड शाखा कार्यालय भक्तपुरको चेक काटी दिएकोमा बैंकिङ कसूरजन्य अपराध गरेको ठहर गरी अदालतले उक्त फैसला गरेको थियो ।

उनलाई फैसला कार्यान्वयनको लागि जिल्ला अदालत काठमाडौंमा पेश गरिएको उक्त व्यूरोले जनाएको छ ।

Published : Friday, 2022 January 7, 11:03 pm