काठमाडौं । झण्डै दुईतिहाइको कम्युनिस्ट सरकारले खाना पकाउने ग्यासको मूल्य बढाएको छ ।

नेपाल आयल निगमले भारतबाट पछिल्लो समय खाना पकाउने ग्यासको मूल्य बढेर आएको भन्दै प्रतिसिलिन्डर २५ रुपियाँ बढाइएको जनाएको छ ।

ग्यासको मूल्य अब प्रतिसिलिन्डर १३७५ रुपियाँ भएको छ ।

निगमले पेट्रोल र डिजेलको मूल्य भने घटाएको छ । भारतबाट पछिल्लो समय डिजेल र पेट्रोलको मूल्य घटेर आएकाले प्रतिलिटर १ रुपियाँ घटाइएको निगमले जानकारी दिएको छ ।

डिजेलको मूल्य प्रतिलिटर ९९ र पेट्रोलको प्रतिलिटर ११० रुपियाँ भएको छ । ग्यासको मूल्य सोमबार राति १२ बजेदेखि लागू हुने निगमले जनाएको छ ।

मूल्य समायोजन गरेपछि नेपालतर्फ वीरगञ्ज नाकाको तुलनामा भारतको रक्सौलमा कायम भएको पेट्रोलको खुद्रा विक्री मूल्य १६ रुपियाँ ४० पैसा प्रतिलिटरले सस्तो र डिजेलको खुद्रा विक्री मूल्य १६ रुपियाँ २७ पैसा प्रतिलिटरले नेपालतर्फ सस्तो हुन गएको निगमले जनाएको छ ।