कांग्रेस नेता बस्नेतद्वारा बाह्रबिसे- ३ मा स्वास्थ्य चौकी तथा प्रसुति केन्द्रको भवनको उद्घाटन

बाह्रबिसे । नेपाली कांग्रेसका नेता एवम् पूर्वमन्त्री मोहनबहादुर बस्नेतले स्वास्थ्य चौकी तथा प्रसुति केन्द्रको नवनिर्मित भवनको उद्घाटन गरेका छन् ।

बुधबार सिन्धुपाल्चोकको बाह्रबिसे नगरपालिका वडा नं. ३ स्थित स्वास्थ्य चौकी तथा प्रसुति केन्द्रको नवनिर्मित भवनको नेता बस्नेतले उद्घाटन गरेका हुन् । प्रसुति र स्वास्थ्य उपचारका लागि आउने सर्वसाधारणलाई नयाँ भवनबाट सेवा दिन सहज हुने नेता बस्नेतले बताए ।

कार्यक्रममा कांग्रेस नेतृ मसिना खड्का, बाह्रबिसे नगरपालिकाका मेयर बालकृष्ण बस्नेत, वडाध्यक्ष लगायतको उपस्थिति रहेको थियो ।

शहीद गंगालाल हृदय रोग केन्द्र, बीर अस्पताल, प्रसुति गृह अस्पतालका अनुभवी चिकित्सकहरूसहितका स्वास्थ्य शिविर पनि राखिएको थियो । शिविरमा स्थानीयले स्वास्थ्य सेवा लिएका थिए ।