मुस्ताङको बोक्सी खोलामाथि हिमपहिरो

जोमसोम । मुस्ताङको थासाङ–२ बोक्सी खोलामाथि हिमपहिरो गएको छ ।

शुक्रबार दिउँसो थासाङस्थित मानापाथी हिमालको फेदबाट मुलिखर्क हुँदै खसेको हिमपहिरोले छिप्लुङसम्म थुनिएको हो ।

थासाङ गाउँपालिका माथि मानापाथीबाट खसेको हिमपहिरो करिब १ हजार मिटरको दूरीमा जमेर बसेको थासाङ गाउँपालिका–२ का वडाध्यक्ष गौतम शेरचनले जानकारी दिएका छन् ।

जिल्ला प्रशासन कार्यालय मुस्ताङले पनि थासाङको बोक्सी खोलामाथि हिमपहिरो खसेर थुनिएको पुष्टि गरेको छ ।

प्रशासनले कुनै पनि बेला हिमपहिरो फुटेर जोखिम निम्त्याउन सक्ने भएकाले सावधानी अपनाउन त्यसक्षेत्रका बासिन्दालाई सचेत गराएको छ ।

यसअघि २०७८ सालमा पानीपाथी हिमालको फेदबाट हिमपहिरो खस्दा थासाङको कोवाङ, नाउरिकोट र बोक्सी खोला क्षेत्रका स्थानीय हाताहाती भएका थिए ।

Published : Friday, 2024 August 23, 5:11 pm