काठमाडौं । गृहमन्त्री रमेश लेखकले प्यालेस्टिनी लडाकु समूह हमासको कब्जामा रहेका नेपालका विपिन जोशीलाई रिहाइको लागि सहयोग गरिदिन कतारसँग आग्रह गरेका छन् ।

सिंहदरबारमा बिहीबार गृहमन्त्री लेखक र नेपालका लागि कतारका राजदूत मिसाल बिन मोहम्मद अल अन्सारीबीच भएको भेटमा विपिन जोशीको रिहाइका लागि सहयोग गर्न आग्रह गरिएको हो ।

भेटमा मन्त्री लेखकले हमासको अपहरणमा रहेका नेपाली विद्यार्थी जोशीको रिहाइका लागि आवश्यक सहयोग गरिदिन राजदूत अन्सारीलाई आग्रह गरेको गृहमन्त्री लेखकको सचिवालयले जनाएको छ ।

अक्टोबर ७ मा हमासले इजरायलमा आक्रमण गर्दा जोशीलाई अपहरण गरेको थियो । राजदूत अन्सारीले जोशीको रिहाइका लागि कतारले आवश्यक पहल गरिरहेको जानकारी दिएका थिए ।

कतारमा रहेका नेपाली कामदारहरूलाई २४ घण्टा नै बिमाको व्यवस्था तथा कतारमा रही मृत्यु एवं घाइते भएका नेपालीहरूको राहत र उद्धारमा ध्यान दिन गृहमन्त्री लेखकले आग्रह गरेका छन् ।

उनले विभिन्न जेलमा सजाय भोगिरहेका नेपाली नागरिकलाई आममाफी तथा सजाय छुट व्यवस्था मिलाइदिन राजदूतसँग आग्रह गरेका छन् ।

सीमापार हुने आर्थिक अपराध नियन्त्रणका विषयमा नेपाल र कतारबीच सहकार्य बढाउनेपर्नेमा समेत मन्त्री लेखकले आग्रह गरेका छन् ।