वीरगञ्ज । वीरगञ्ज महानगरपालिकामा जनप्रतिनिधिका समर्थक र कर्मचारीहरूबीच झडप भएको छ ।

कार्यकारी अधिकृतको खाली कक्षमा को बस्ने भन्ने विवाद बढ्दै जाँदा मंगलबार वीरगन्ज महानगरपालिकामा उपमेयर, वडाध्यक्ष र कर्मचारीबीच झडप भएको हो ।

केही दिनअघि मेयर राजेशमान सिंह नवनिर्मित भवनमा सरेपछि उनको कक्षमा सामाजिक सुरक्षा तथा पञ्जीकरण शाखा राख्न खोजेपछि उपमेयर इम्तियाज आलम हातपातमा उत्रिएका थिए ।

आफ्नो कक्षसँग जोडिएकाले आफ्नो सचिवालय राख्नुपर्छ भन्ने उनको दाबी थियो । कर्मचारीले नमानेपछि दुई पक्षबीच कुटाकुट भएको छ ।

पञ्जीकरण शाखा साँघुरो कोठामा सञ्चालित रहेको भन्दै कर्मचारीले सो कक्षमा सार्न चाहेका थिए ।

महानगरमा कुटाकुट हुन थालेपछि जिल्ला प्रहरी कार्यालयले ठूलो संख्यामा सुरक्षाकर्मी परिचालन गरेको थियो ।

वर्ष वैशाखमा भएको स्थानीय तहको निर्वाचनमा वीरगन्ज महानगरपालिकामा कांग्रेस र जसपा गठबन्धनका सिंह मेयरमा र उपमेयरमा कांग्रेसका आलम विजयी भएका थिए ।