काठमाडौं । राष्ट्रपति रामचन्द्र पौडेलसँग स्वास्थ तथा जनसंख्यामन्त्री मोहनबहादुर बस्नेत भेट गरेका छन् ।

बुधबार शीतलनिवासमा भएको भेटमा राष्ट्रपति पौडेलले मन्त्री बस्नेतलाई भूकम्पबाट भएका घाइतेहरूको शीघ्र तथा प्रभावकारी उपचार सेवामा कुनै कसर बाँकी नराख्न निर्देशन दिएका छन् ।

पौडेलले राजधानीलगायत देशका विभिन्न अस्पतालमा उपचाररत भूकम्पप्रभावितहरूको अवस्था, उपचार सेवा र सुविधालगायतका विषयमा मन्त्री बस्नेतसँग जानकारी लिएका छन् ।

राष्ट्रपति पौडेलले उपचार प्रक्रियालाई सहज, सरल प्रभावकारी र गुणस्तरीय बनाउन तथा यसमा सरकारका तर्फबाट कुनै पनि कसर बाँकी नराख्न मन्त्री बस्नेतसँग आग्रह गरेका छन् ।

पौडेलले अस्पतालहरूको स्तरवृद्वि, आधुनिक उपकरण, दक्ष चिकित्सकसहित स्वास्थ्यकर्मीको व्यवस्थापन र गुणस्तरीय सेवा प्रवाहबारे पनि चासो राखेका छन् ।

जाडोयामसँगै देखापर्ने विभिन्न रोगको उपचारका लागि पनि बेलैमा आवश्यक तयारी गर्न पनि पौडेलले मन्त्री बस्नेतसँग आग्रह गरेका छन् ।