ओखलढुंगा । नेपाली कांग्रेसका केन्द्रीय सदस्य एवम् पूर्वसांसद रामहरि खतिवडाले पार्टीका नेता कार्यकर्ताहरूसँग भेटघाट गरेका छन् ।

आइतबार खतिवडाले ओेखलढुंगाको खिजिदेम्बामा पार्टीका नेता कार्यकर्ताहरूसँग भेट गरेर समस्या र स्थानीय तहको निर्वाचन लगायतका विषयमा छलफल गरेका हुन् । खिजिदेम्वा बिकट गाउँपालिकामा पर्छ ।

नेता खतिवडाले स्थानीय तहको निर्वाचन आउन लागेको भन्दै निर्वाचनमा केन्द्रित हुन आग्रह गरेका छन् । ‘स्थानीय तहको निर्वाचन गर्ने तयारी भएको छ’, उनले भने, ‘प्रदेश र प्रतिनिधि सभाको निर्वाचन पनि आउँदैछ । कांग्रेसलाई जिताउने गरेर हामी सबैले काम गर्नुपर्छ ।’

नेता खतिवडाले गाउँका जनताको कामका लागि आफू सधैँ साथमा रहेको बताएका छन् ।

नेता खतिवडाले ज्वरोको औषधि प्यारासिटामोल पनि गाउँपालिकालाई उपलब्ध गराएका छन् ।

खिजिदेम्बाका कांग्रेसका नेताहरू राम सुनुवार, देवबहादुर कँडेललगायतले कांग्रेसप्रति जनताको मोह बढेर आएको भन्दै आगामी चुनावमा कम्युनिस्टलाई जनताले भोट नदिने बताएका थिए ।

खतिवडाले लिखु, चम्पादेवी, सुनकोशीलगायतका स्थानमा पुगेर पार्टीका नेता कार्यकर्तासँग भेट गर्नेछन् । उनले प्यारासिटामोल पनि हस्तान्तरण गर्नेछन् ।