काठमाडौं । गृहमन्त्री बालकृष्ण खाणले १२ जिल्लाका जिल्लाको शान्तिसुरक्षाको अवस्थाका बारेमा जानकारी लिएका छन् ।

सोमबार गृहमन्त्री खाणले जिल्लाका प्रहरी प्रमुखहरूलाई फोन गरेर शान्तिसुरक्षाको अवस्था, प्रहरीमा कोभिड– १९ को प्रभाव र प्रहरीको रासनबारे जानकारी लिएका हुन् । खाणले प्रहरीको रासनमा कुनै पनि प्रकारको सम्झौता नगर्न कठोर निर्देशन दिएका छन् ।

प्रहरीको रासन ठेक्काका क्रममा विभिन्न चलखेल हुने र प्रहरीलाई कमसल खालको रासन खुवाएको भनेर आलोचना भइरहेका बेला गृहमन्त्री खाणले प्रहरीको खान्कीमा कुनै सम्झौता नगर्न आदेश दिएका हुन् ।

गृहमन्त्री खाणले झापा, इलाम, पाँचथर, ताप्लेजुङ, धनुषा, सप्तरी, सिराहा, सर्लाही, अछाम, पर्सा, मकवानपुर र रौतहटका प्रहरी प्रमुखसँग कुराकानी गरेका हुन् ।

सिराहाका प्रहरी प्रमुख प्रहरी उपरीक्षक अर्जुन तिमिल्सिनाले मन्त्री खाणले जिल्लामा शान्तिसुरक्षाको अवस्था, प्रहरीको रासनभत्ता, शीतलहरको प्रभाव र न्यानो कपडा वितरणबारे जानकारी लिएको बताएका छन् ।

गृहमन्त्री खाणले आफै जिल्लाका प्रहरी प्रमुख र प्रमुख जिल्ला अधिकारीहरूलाई फोन गरेर जानकारी लिने गरेका छन् ।