महेन्द्रनगर । नेपाली कांग्रेस कञ्चनपुरको सभापतिमा पदम बोगटी निर्वाचित भएका छन् ।

आइतबार सार्वजनिक भएको अन्तिम नतिजाअनुसार बोगटीले सभापतिमा शानदार जित हासिल गरेका हुन् । बोगटीले ८०६ मत प्राप्त गरेका छन् ।

सभापतिमा निर्वाचित बोगटी सभापति शेरबहादुर देउवा निकटका हुन् । बोगटीलाई केन्द्रीय सदस्य रमेश लेखकको समर्थन थियो ।

बोगटीसँग सभापतिमा बहादुरसिंह थापा पराजित भएका छन् । थापाले भने ७१५ मत प्राप्त गरेका छन् । थापालाई केन्द्रीय सदस्य एनपी साउदको समर्थन थियो ।

निर्वाचनमा एक हजार ५ सय ७१ मत खसेको थियो । उप–सभापतिमा मीनबहादुर सिंह ७८६ र हरिचन्द्र राना ७६३ मतका साथ विजयी भएका छन् ।

सचिवमा भमराज भट्ट ७२८ र हेमराज ओझा ६९४ मतसहित विजयी भएका छन् ।

सह–सचिवमा नाफुसिंह साउद ७२६ र पुष्कल चौधरी ६७४ मतसहित विजयी भएका छन् ।

लेखकले बोगटीलाई सभापतिमा विजयी बनाएर साउदलाई पाठ सिकाएका छन् । लेखकविरुद्ध साउदका हर्कतले सीमा नाघेको छ ।