काठमाडौं । दिल लामा संयोजक रहेको नेपाल तरुण दलले सुनसरीको देवानगञ्ज घटनाको निष्पक्ष छानबिन, दोषीलाई कारबाही लगायतका माग राखेर प्रदर्शन गर्न लागेको छ ।

शुक्रबार साउन १५ गते अपरान्ह साढे ५ बजे तरुण दलले काठमाडौंको घण्टाघरस्थित त्रिचन्द्र क्याम्पस अगाडि बृहत मसाल जुलुस प्रदर्शन गर्न लागिएको तरुण दलका संयोजक लामाले बताएका छन् । उनले मसाल जुलुसमा सहभागी हुन तरुणहरूलाई अपील गरेका छन् ।

शेरबहादुर देउवा पक्षीय नेपाली कांग्रेस निकटको नेपाल तरुण दल केन्द्रीय कार्यसमितिले सुनसरी घटनाको छानबिन, दोषीमाथि कानूनी कारबाही र सरकारको भूमिकाप्रति असन्तुष्टि व्यक्त प्रदर्शन गर्न लागेको छ ।

नेपाली कांग्रेसलाई गगन थापाले भृकुटीमण्डप भेलाबाट हाइज्याक गरेपछि पार्टीभित्र बृहत एकताका लागि दवाव सिर्जना गर्न तरुण, विद्यार्थीका साथै कांग्रेसका नेताहरूले समानान्तर गतिविधि गर्दै आएका छन् । देउवा पक्षीय नेताहरूले काठमाडौंको चुनदेवीमा सम्पर्क कार्यालय समेत स्थापना गरेका छन् ।