लहान । सुनसरीको घटनापछि भएका प्रदर्शनहरूमा सरकारी पक्षबाट बल प्रयोग भएपछि सिरहामा आगजनी र तोडफोडका घटनाहरू बढ्न थालेका छन् ।

बिहीबार सिरहामा प्रदर्शनले चर्को रुप लिन थालेपछि अहिले अवस्था तनावग्रस्त बनेको छ । सिरहाका विभिन्न ठाउँमा प्रशासनले कर्फ्यू आदेश पनि जारी गरेको छ ।

सिरहाको गोलबजारमा रहेको सिरहा सुपरमार्केटद्वारा सञ्चालित एबी मललाई प्रदर्शनकारीले जलाइदिएका छन् । प्रहरीले अवस्था नियन्त्रणमा लिने प्रयास गरिरहेको छ ।

बिहीबार बिहानैबाट सिरहामा दुई समूहबीच शुरु भएको झडप उग्र बन्दै गएको हो । प्रशासनले सिरहाका विभिन्न स्थानमा दिउँसोबाटै कर्फ्यु लगाएको छ ।

प्रदर्शनका क्रममा सुरक्षाकर्मीको गोली लागेर गणेश यादवको मृत्यु भएपछि अवस्था झनै तनावग्रस्त बन्न पुगेको स्थानीयले बताएका छन् । अवस्था नियन्त्रणमा लिनका लागि प्रहरीले केही सेल अश्रुग्यास प्रहार गरेको छ । अहिले पनि आगजनी र प्रदर्शनको क्रम भने रोकिएको छैन ।