काठमाडौं । नेपाली कांग्रेसका कार्यबाहक सभापति पूर्णबहादुर खड्काले सर्वोच्च अदालतमा दर्ता गरिएको रिट फिर्ता हुने भन्ने समाचारहरू गलत रहेको बताएका छन् ।

सोमबार साँझ सामाजिक सञ्जालमार्फत् कार्यबाहक सभापति खड्काले सर्वोच्च अदालतमा न्यायका लागि दर्ता गरिएको रिट फिर्ता नहुने बताए ।

उनले भने, ‘केही संचार माध्यममा अशाएका गलत समाचारबारे स्पष्ट होस् । २०८२ माघ २ गते कांग्रेस पार्टीका सम्बन्धमा निर्वाचन आयोगले गरेको अबैधानिक निर्णयका बिरुद्धमा २०८२ माघ ४ गते सर्वोच्च अदालतमा हामीले न्याय प्राप्तिको लागि दर्ता गरेको रिट फिर्ता हुने भन्ने समाचार पूर्ण रुपमा असत्य भएको म स्पष्ट पार्न चाहान्छु ।’

केही सञ्चारमाध्यम र समाजिक सञ्जालमा नेपाली कांग्रेसको आधिकारिकताका विषयमा परेको रिटलाई कांग्रेसले फिर्ता लिन लागेको भनेर भ्रम फैलाइएपछि कार्यबाहक सभापति खड्काले रिट फिर्ता नहुने बताए ।

माघ ६ गते मंगलबार भोलि सर्वोच्च अदालतमा नेपाली कांग्रेसको आधिकारिताका विषयमा परेको रिटको सुनुवाई हुँदैछ । कार्यबाहक सभापति खड्काले सर्वोच्च अदालतले निर्वाचन आयोगको अन्यायपूर्ण निर्णय खारेजीको माग गर्दै रिट दायर गरेका छन् ।