लण्डन । चीनको शिजियान–३२ उपग्रह प्रक्षेपण गर्ने प्रयास असफल भएको छ ।

शिजियान– ३२ प्रक्षेपण दक्षिण–पश्चिमी सिचुआन प्रान्तमा अवस्थित सिचाङ उपग्रह प्रक्षेपण केन्द्रबाट लङ मार्च–३बी वहाक रकेट प्रयोगबाट गरिएको थियो । चिनियाँ अधिकारीहरूका अनुसार रकेट शनिबार बिहान १२ः५५ बजे (बेइजिङ समय) सफलतापूर्वक प्रक्षेपण स्थलबाट उडान भरेको थियो ।

उडानको क्रममा रकेटको प्रणालीमा समस्या देखापरेपछि मिसन असफल भएको पुष्टि गरिएको छ । कुन चरणमा र कुन प्रणालीमा समस्या देखा परेको हो भन्ने विषयमा भने हालसम्म विस्तृत जानकारी सार्वजनिक गरिएको छैन ।

शिजियान–३२ उपग्रह वैज्ञानिक प्रयोग तथा प्रविधि परीक्षणका लागि प्रयोग गरिने शिजियान (प्रयोगात्मक) उपग्रह शृङ्खलाको हिस्सा हो । यस शृङ्खलाका उपग्रहहरू प्रायः नयाँ अन्तरिक्ष प्रविधि परीक्षण तथा सम्बन्धित वैज्ञानिक अध्ययनका लागि प्रयोग गरिँदै आएका छन् ।

लङ मार्च–३बी चीनको मुख्य मध्यम–क्षमताको वहाक रकेटमध्ये एक हो, जसलाई भू–स्थिर स्थानान्तरण कक्षा तथा अन्य उच्च कक्षमा उपग्रह पठाउन प्रयोग गरिन्छ । रकेटले अघिल्ला वर्षहरूमा धेरै सफल प्रक्षेपणहरू गरेको भए पनि कहिलेकाहीँ प्राविधिक चुनौतीका कारण असफलता पनि देखिएको छ ।

प्रक्षेपण असफल भएपछि सम्बन्धित प्राविधिक तथा अनुसन्धान टोलीले घटनाको कारण पत्ता लगाउन विस्तृत अनुसन्धान शुरु गरिसकेको जनाइएको छ । अनुसन्धान पूरा भएपछि असफलताको कारण र भविष्यमा यस्ता घटना दोहोरिन नदिन अपनाइने सुधारात्मक उपायबारे जानकारी सार्वजनिक गरिने अपेक्षा गरिएको छ ।