बनकसबासामा बस दुर्घटना, पैदल यात्रुको मृत्यु, ५ यात्रु सामान्य घाइते

चन्द्रौटा । कपिलवस्तु जिल्लास्थित पूर्व पश्चिम महेन्द्र राजमार्ग अन्तर्गत शिवराज नगरपालिका वडा नं. १ बनकसबासामा बस दुर्घटना भएको छ ।

बिहीबार बिहान करिब २ बजे काठमाडौंबाट धनगढीतर्फ जाँदै गरेको बा.प्र.०१–००६ ख ८५०६ नम्बरको बस अनियन्त्रित भई सडकमा दुर्घटना भएको प्रहरीले जनाएको छ । बसले एकजना पैदलयात्रीलाई ठक्कर दिएको छ । बसमा सवार ५ जना यात्रु घाइते भएको वडा प्रहरी कार्यालय चन्द्रौटाले जनाएको छ ।

दुर्घटनामा अन्दाजी ५५ वर्षीय पुरुष पैदलयात्रीको घटनास्थलबाट चन्द्रौटा आधारभूत स्वास्थ्य सेवा अस्पतालमा उपचारका लागि लैजाँदा मृत्यु भएको प्रहरीले जनाएको छ ।

घाइते यात्रुहरूलाई चन्द्रौटास्थित सञ्जीवनी सामुदायिक अस्पतालमा उपचारपछि घर फर्किएका वडा प्रहरी कार्यालय चन्द्रौटाका इञ्चार्ज प्रहरी निरीक्षक सन्तोष घिमिरेले बताए ।

Published : Thursday, 2025 October 30, 8:41 am