काठमाडौं । नेपाली कांग्रेसका सभापति शेरबहादुर देउवाले उपसभापति पूर्णबहादुर खड्कालाई कार्यबाहक सभापतिको अधिकार दिएका छन् ।

मंगलबार पार्टी केन्द्रीय कार्यालय, सानेपामा बसेको केन्द्रीय कार्यसमितिको बैठकमा देउवाले खड्कालाई कार्यबाहक सभापतिको जिम्मेवारी प्रदान गरेका हुन् । सभापति देउवा उपचारका लागि सिङ्गापुर जान लागेका छन् । देउवासँगै उनकी पत्नी डा.आरजु राणा पनि सिङ्गापुर जान लागेकी छिन् ।

‘मेरो स्वास्थ्यका कारणले म पार्टीका उप–सभापति श्री पूर्णबहादुर खड्कालाई कार्यबाहक सभापतिका रूपमा काम गर्ने गरी तोकेको छु । वहाँले पार्टीको बृहत्तर हितमा काम गर्नु हुनेछ भन्ने मेरो विश्वास छ,’ सभापति देउवाले भनेका छन् ।

भदौ २४ गते बुढानिलकण्ठस्थित निवासमा बसेका बेला उत्तेजित र अराजक समूह प्रवेश गरी सभापति देउवा र नेतृ डा.राणाको हत्या गर्ने उद्देश्यले सांघातिक आक्रमण गरेर गम्भीर घाइते बनाएको थियो ।