काठमाडौं । नवनियुक्त गृहमन्त्री ओमप्रकाश अर्यालले जेनजी पुस्ताको आन्दोलनका क्रममा भएका हिंसात्मक घटनाको छानविन गर्न समिति गठन हुने बताएका छन् ।

सोमबार सिंहदरबारमा पदभार ग्रहणपछि पत्रकारहरूसँग कुरा गर्दै अर्यालले जेनजी आन्दोलनका क्रममा देशभर भएका हिंसात्मक घटनाको छानविनका लागि समिति गठन हुने बताएका हुन् ।

उनले भने, ‘जेनजी आन्दोलनका नाममा देशभर हिंसात्मक घटना भएका छन् । घटनाको सत्यतथ्य बाहिर ल्याउन समिति गठन हुन्छ ।’

भदौ २३ र २४ गते काठमाडौंसहित देशभर भएको जेनजी पुस्ताको आन्दोलनको भएको थियो । आन्दोलनमा हालसम्म ७२ जनाको मृत्यु भएको छ । करीव २ हजार घाइते भएका छन् ।

जेनजी आन्दोलनका क्रममा सिंहदरबार, संसद भवन, राष्ट्रपति भवन, सर्वोच्च अदालत, व्यापारी भवनमा तोडफोड, आगजनी, लुटपाट भएका छन् । अर्बौंको क्षति भएको छ ।

यसैबीच, गृह तथा कानूनमन्त्री अर्यालले पदबहालीलगत्तै केही निर्णय गरेका छन् । गत २३ र २४ गतेको घटनामा मृत्यु भएकाका परिवारलाई काजकिरियाबापत १ लाखका दरले राहत उपलब्ध गराउने निर्णय मन्त्री अर्यालले गरेका छन् । राष्ट्रिय शोक दिवस मनाउने र राष्ट्रिय झन्डा झुकाउने निर्णय भएको उनले जानकारी दिएका छन् ।