काठमाडौं । नेपाल विद्युत् प्राधिकरणका नवनियुक्त कार्यकारी निर्देशक हितेन्द्रदेव शाक्यले श्वेतपत्र जारी गर्ने भएका छन् ।

बुधबार बसेको प्राधिकरणको सञ्चालक समितिको बैठकमा श्वेतपत्र जारी गर्ने सम्बन्धी प्रस्ताव कार्यकारी निर्देशक शाक्यले राखेका थिए । शाक्यको सो प्रस्तावलाई समितिले सर्वसम्मत पारित गरेको छ ।

प्राधिकरणको वर्तमान वित्तीय तथा अन्य अवस्थाबारे जानकारी लिन श्वेतपत्र जारी गर्ने निर्णय भएको शाक्यले बताएका छन् । श्वेतपत्र जारी भयो भने निवर्तमान कार्यकारी निर्देशक कुलमान घिसिङको अनुहार उदाङ्गो हुनेछ । कुलमानका काण्डहरू बाहिर आउनेछन् ।

नेपाल विद्युत् प्राधिकरणको वित्तीय अवस्था, नाफा तथा नोक्सान, खर्च, एवम् बक्यौतालगायत विषय विवादमा छ । प्राधिकरणले नाफा आर्जन गरिरहेको बताए पनि सरकारलाई आयकर तिरेको छैन ।

डेडिकेटेड तथा ट्रंकलाइन मात्रै होइन, स्थानीय तहहरूसमेतको बक्यौताको विवादमा प्राधिकरण छ ।