काठमाडौं । सरकारले संसदमा अनुमोदनका लागि पेश गरेका अध्यादेशहरूप्रति जनता समाजवादी पार्टी नेपाल (जसपा)ले लचकता देखाएको छ ।

बुधबार सिंहदरबारमा पत्रकारहरूसँग कुरा गर्दै जसपा नेपालका उपाध्यक्ष राजकिशोर यादवले अध्यादेशअनुसार आफ्नो पार्टीको धारणा फरक हुन सक्ने बताए । उनले भने, ‘अध्यादेशहरूलाई हामीले सोलोडोलो हेरेका छैनौं । ब्ल्याक एण्ड ह्वाइटमा हेरेका छैनौं ।’

अध्यादेशको विषयको आधारमा धारणा बन्न सक्ने उपाध्यक्ष यादवले बताएका छन् । उनले अध्यादेशको विषयमा संसदीय दलले निर्णय गर्ने बताएका छन् ।

‘अध्ययनको आधारमा स्पेसिफिक अध्यादेशमा हाम्रो फरक–फरक धारणा हुन सक्छ’, उपाध्यक्ष यादवले भने, ‘एउटामा हामी सकारात्मक हुन सक्छौं । अर्कोमा जो गम्भीर प्रकारका असहमतिहरू छभने त्यसलाई त्यही ढंगले हेर्छौं ।’

बिहीबार बिहान ११ बजे जसपा नेपालको संसदीय दलको बैठक बस्न लागेको छ । अध्यादेशमा के गर्ने भनेर जसपा नेपालले निर्णय लिनेछ ।

सरकारले जारी गरेका ६ वटा अध्यादेशहरू सदनमा प्रस्तुत भइसकेका छन् । बिहीबार प्रतिनिधि सभा र राष्ट्रिय सभा दुवैमा सबै अध्यादेशहरू निर्णयार्थ प्रस्तुत गर्ने सम्भावित कार्यसूची छ ।

प्रतिनिधि सभामा सत्तापक्षको बहुमत पुग्नेछ । तर, राष्ट्रिय सभामा अध्यादेशहरू अनुमोदन हुन जसपा नेपालको समर्थन आवश्यक पर्छ । जसपा नेपाल अध्यादेशहरूमा नरम देखिएपछि सरकारलाई केही राहत मिलेको छ ।