काठमाडौं । सार्वजनिक लेखा समितिले उजुरीबारे अध्ययन गर्न नेपाली कांग्रेसका सांसद सञ्जय गौतमको संयोजकत्वमा उप–समिति गठन गरेको छ ।

मंगलबार सिंहदरबारमा बसेको समितिको बैठकले गौतमको संयोजकत्वमा ७ सदस्सीय उप–समिति गठन गरेको सभापति ऋषिकेश पोखरेलले बताए ।

सभापति पोखरेलले समितिमा १०० उजुरीहरू परेको जानकारी गराएका छन् । ती उजुरीहरूबारेमा छानबिन गर्न ७ दिनको समय दिएर उप–समिति गठन भएको छ ।

उप–समितिको सदस्यहरूमा एमालेका सांसद गोकुल बास्कोटा, नेकपा (माओवादी केन्द्र)का सांसद लेखनाथ दाहाल, राष्ट्रिय स्वतन्त्र पार्टी (रास्वपा)का सांसद हरि ढकाल, कांग्रेस सांसद मञ्जु खाण, नेकपा (एकीकृत समाजवादी)का सांसद प्रेम आले र स्वतन्त्र सांसद अमरेशकुमार सिंह रहेका छन् ।

यसैबीच, सार्वजनिक लेखा समितिले सिमेन्टको मूल्य वृद्धिबारे छलफल गर्न उद्योग वाणिज्य तथा आपूर्तिमन्त्री दामोदर भण्डारीलाई बोलाउने निर्णय गरेको छ । मन्त्री भण्डारी र सचिवलाई छलफलका लागि बुधबार बिहान ११ बजेका लागि बोलाइएको छ ।