तीन समितिका संयोजकहरू चयन गर्ने निर्णय कांग्रेसद्वारा अनुमोदन

काठमाडौं । नेपाली कांग्रेसले प्रतिनिधि सभाअन्तर्गतका समितिहरूमा आफ्नो प्रभावकारी कार्य गर्नका लागि संयोजकहरू चयन गर्ने निर्णयलाई अनुमोदन गरेको छ ।

बिहीबार बुढानिलकण्ठस्थित सभापति शेरबहादुर देउवाको निवासमा बसेको संसदीय दल कार्यसमितिको बैठकले विभिन्न समितिहरूमा संयोजक चयन गर्ने कांग्रेसको निर्णयलाई अनुमोदन गरेको प्रमुख सचेतक श्यामकुमार घिमिरेद्वारा जारी विज्ञप्तिमा उल्लेख छ ।

कांग्रेसका सांसद र समितिका सभापतिहरूलाई समन्वय गरेर विधेयक तथा विषयहरूमा सहयोग गर्न कांग्रेसले तीन वटा समितिमा संयोजकहरू चयन गरेको थियो ।

‘प्रतिनिधि सभा अन्तर्गतका अर्थ समितिका लागि माननीय डा. प्रकाशशरण महत, सार्वजनिक लेखा समितिका लागि माननीय संजय कुमार गौतम र कृषि, सहकारी तथा प्राकृतिक स्रोत समितिका लागि माननीय चन्दा चौधरी संयोजक चयन हुनु भएको निर्णयलाई यो बैठक अनुमोदन गर्दछ’, विज्ञप्तिमा उल्लेख छ ।

Published : Thursday, 2025 January 16, 7:02 pm