काठमाडौं । नेपाली कांग्रेसका उपसभापति पूर्णबहादुर खड्कालाई कांग्रेस–एमालेको दुई दलीय संयन्त्रको संयोजनको जिम्मेवारी प्रदान गरिएको छ ।

बुधबार सिंहदरबारमा बसेको संयन्त्रको बैठकले उपसभापति खड्कालाई पुनः संयोजनको जिम्मेवारी प्रदान गरेको हो । संयन्त्रले आफ्नो जिम्मेवारीअनुसारको काम गर्दै आएको छ ।

एमालेका अध्यक्ष समेत रहेका प्रधानमन्त्री केपी ओली र कांग्रेस सभापति शेरबहादुर देउवाको नेतृत्वमा गठित दुई दलीय संयन्त्रमा दुबै पार्टीबाट चार–चार जना सदस्य छन् ।

कांग्रेसबाट उपसभापति पूर्णबहादुर खड्का, गृहमन्त्री रमेश लेखक, महामन्त्री गगनकुमार थापा र परराष्ट्रमन्त्री डा.आरजु राणा देउवा छन् ।

एमालेबाट वरिष्ठ उपाध्यक्ष ईश्वर पोखरेल, अर्थमन्त्री विष्णु पौडेल, महासचिव शंकर पोखरेल र उपमहासचिव विष्णु रिमाल छन् ।

सरकारका काम प्रभावकारी बनाउन कांग्रेस र एमालेले कातिक १५ गते संयन्त्र बनाएका थिए ।