हेटौँडा । जिल्ला प्रहरी कार्यालय मकवानपुरले ५६ किलो गाँजासहित २७ वर्षीय अनिलकुमार थिङलाई पक्राउ गरेको छ ।

आइतबार ५ः३० बजे विशेष सूचनाको अधारमा इलाका प्रहरी कार्यालय मनहरीबाट खटिएको प्रहरी टोलीले मनहरीको ज्यामिरेबाट कन्टेरमा रहेको गाँजासहित थिङलाई पक्राउ गरेको हो ।

पूर्वपश्चिम महेन्द्रराजमार्ग सडकखण्डमा मनहरीबाट हेटौँडातर्फ जाँदै गरेको ना.६ ख २३४४ नम्बरको कन्टेनर गाडीमा चेकजाँच गर्दा मनहरी गाउँपालिका वडा नं. ८ सिमपानी बस्ने थिङलाई पक्राउ गरिएको विज्ञप्तिमा उल्लेख छ ।

कन्टेनरको चालक बस्ने सिटमाथि क्याबिनको भागमा लुकाई छिपाई राखी ल्याइएको अवस्थामा ५६ किलो लागूऔषध गाँजा फेला परेको थियो ।

गाँजा, कन्टेनर गाडी सहित थिङलाई नियन्त्रणमा लिई मकवानपुर जिल्ला अदालत हेटौँडाबाट १० दिनको म्याद थप अनुमति लिई अनुसन्धान कार्य भइरहेको जिल्ला प्रहरी कार्यालय मकवानपुरका प्रहरी प्रमुख (एसपी) विश्वराज खड्काले बताए ।