काठमाडौं । नेपाली कांग्रेस केन्द्रीय कार्यसमितिका सदस्य दिनेश कोइरालाका पिता एवं प्रजातन्त्र सेनानी भीष्मकान्त कोइरालाको निधन भएको छ ।

भीष्मकान्तको मंसिर ११ गते निधन भएको कांग्रेसले जनाएको छ । शोक वक्तव्य जारी गरेर कांग्रेसले भीष्मकान्तको निधनप्रति गहिरो दुःख व्यक्त गरेको छ ।

विक्रम संवत् १९९८ असोज १८ गते जन्मिएका भीष्मकान्त चितवनको भरतपुर महानगरपालिका वडा नं. ६ गीतानगर निवासीमा बस्दै आएका थिए । भीष्मकान्त कोइराला नेपाली कांग्रेस गाउँ कार्यसमितिको पूर्व सदस्य एवं सल्लाहकार पनि थिए ।

स्व.कोइरालाले नेपाली कांग्रेसको संगठन निर्माण र नेपालको लोकतान्त्रिक आन्दोलनहरूमा सक्रिय भूमिका निर्वाह गरेको शोक वक्तव्यमा उल्लेख छ ।

स्व.कोइराला विभिन्न संघ संस्थामा आवद्ध रहेका थिए । उनी सामाजिक क्षेत्रमा समेत संलग्न रहँदै आएका थिए । कोइरालाको निधनबाट नेपाली कांग्रेसले एक अग्रज र अनुभवी व्यक्तित्वलाई गुमाएको जनाएको छ ।

भीष्मकान्त कोइरालाको निधनप्रति नेपाली कांग्रेसका सभापति एवं पूर्व प्रधानमन्त्री शेरबहादुर देउवाले गहिरो दुःख व्यक्त गरेका छन् ।

‘उहाँप्रति भावपूर्ण श्रद्धाञ्जलि अर्पण गर्दै आत्माको चीर शान्तिको कामना साथ शोक सन्तप्त परिवारजनप्रति पार्टी र आफ्नो तर्फबाट गहिरो समवेदना प्रकट गर्नु भएको छ’, शोक वक्तव्यमा उल्लेख छ ।