काठमाडौं । जिल्ला प्रहरी कार्यालय बाराले १४ किलो अबैध चाँदी सरसामानसहित २ जना पुरूष व्यक्तिलाई नियन्त्रणमा लिएको छ ।

शुक्रबार बिहान करीव ८ इलाका प्रहरी कार्यालय अमलेखगंजको टोलीले १४ किलो चाँदीसहित दुई जनालाई पक्राउ गरेको विज्ञप्तिमा उल्लेख छ ।

बाराको जीतपुरसिमरा उप–महानगरपालिका वडा नं.२१ अमलेखगंजस्थितमा पथलैयाबाट हेटौँडातर्फ जाँदै गरेको मोटरसाइकलमा चेकजाँच गर्दा चाँदी बरामद भएको थियो ।

मोटरसाइकलको ट्याङ्कीभित्र फल्स बटम बनाई लुकाईछिपाई चाँदी राखिएको थियो । अबैध चाँदीको अन्दाजी मूल्य २५ लाख ४ हजार ९ सय ५० रूपिया बराबर पर्छ ।

ना ५२ प २५८४ नम्बरको २२० सिसी पल्सर मोटरसाइकलका चालक बाराको प्रसौनी गाउँपालिका वडा नं.६ प्रस्टोका बस्ने वर्ष ३३ का सन्तोष साह सोनारको साथबाट ९ किलो चाँदी बरामद भएको छ ।

ना ५५ प ३९३२ नम्बरको १५० सिसि पल्सर मोटरसाइकलका चालक बाराको जीतपुर सिमरा उपमहानगरपालिका वडा नम्बर ८ गमरगावाटोल बस्ने वर्ष २७ को सुरेश महतोको साथबाट ५ किलो चाँदी बरामद भएको छ ।