काठमाडौं । नेपाली कांग्रेसका नेता एवम् पूर्वअर्थराज्यमन्त्री उदयशम्शेर राणाले ललितपुरको बाढी, पहिरो प्रभावित क्षेत्रमा राहत सामग्री लगेर वितरण गरेका छन् ।

बुधबार सांसद राणाले राहतका सामग्रीसहित दक्षिण ललितपुर हेलिकप्टरमा लगेका छन् । नेपाली सेनाको ठूलो स्काई हेलिकप्टरमार्फत सांसद राणाले राहतका सामग्री आफ्नो निर्वाचन क्षेत्रमा लगेको उनको निजी सचिवालयले जनाएको छ ।

महांकाल गाउँपालिकाको २ ठाउँ र बागमती गाउँपालिकाको १ ठाउँमा हेलिकप्टरका लागि स्टेसन बनाइ राहत सामग्री झारेर वितरण गरिनेछ ।

राहत सामग्री झारेर फर्कने क्रममा हेलिकप्टरले बुखेलबाट बिरामी परेका शेषानन्द घिमिरे लिएर आउनेछ ।

बाढी र पहिरोका कारण ललितपुरकोे दक्षिण क्षेत्रमा राहतका सामग्री लिएर जान समस्या छ । सवारी साधन जान नसकेपछि कांग्रेसका सांसद राणाले हेलिकप्टरमार्फत राहत सामग्री लगेका छन् ।

ललितपुरको दक्षिण भेगमा बाढी र पहिरोले ठूलो नोक्सानी गरेको छ । सडकहरू भत्किएका छन् । भत्किएका सडक मर्मतसम्भारको तयारी भइरहेका छन् । सांसद राणाले समस्यामा परेका पीडित जनतालाई सहयोग गर्न राहत सामग्री लिएर गएका हुन् ।