बर्दघाट । नवलपरासी बर्दघाट सुस्तापूर्वको बर्दघाट २ चिसापानीमा संघीय राजधानी बाहिर पहिलो ट्रमा सेन्टर निर्माण शुरु भएको छ ।

सेन्टरको स्वास्थ्य तथा जनसंख्यामन्त्री प्रदीप पौडेलले शिलान्यास गरेका छन् । नेपाली कांग्रेसका केन्द्रीय सदस्य समेत रहेका प्रतिनिधि सभाका सांसद विनोद चौधरीको विशेष पहलमा यो ट्रमा सेन्टर निर्माण हुन लागेको छ । १२ करोड ३४ लाख रुपियाँ लागतमा संघ सरकारबाट निर्माण शुरु भएको सेन्टर एक बिघा बढी क्षेत्रफलमा बन्नेछ ।

१५ बेड क्षमताको भवन शिलान्यास गर्दै मन्त्री पौडेलले विशिष्टिकृत सेवाहरू विस्तार गर्ने सोंच आफूहरूको रहेको बताएका छन् ।

उनले प्रदेशस्तरमा रहेका प्रादेशिक अस्पतालहरूबाट संघीय राजधानीमा उपलब्ध सेवाहरू विस्तार गर्ने प्रयास थालिएको बताए ।

सांसद चौधरीले आफ्नो निर्वाचन क्षेत्रमा निर्वाचित भएसँगै सेन्टर खोल्ने चाहना राखेकामा अघि बढ्न सफल भएको बताए ।

चौधरीले ट्रमा सेन्टर बनाउन सघाउने संघीय सरकारलगायत सबैप्रति आभार प्रकट गरेका छन् ।