धनगढी । परराष्ट्रमन्त्री डा.आरजु राणा देउवाले महिला प्रधानमन्त्रीको कुरा एमाले अध्यक्ष एवं प्रधानमन्त्री केपी ओलीले आफ्नै पार्टीका नेताका लागि बोलेको हुनुपर्ने बताएकी छिन् ।

बिहीबार धनगढीस्थित आफ्नै निवासमा आयोजित पत्रकार भेटघाट कार्यक्रममा मन्त्री डा.राणाले भनिन्, ‘महिला प्रधानमन्त्रीको कुरा ल्याइ दिएकोमा ओलीजीलाई धन्यवाद । यसले एउटा तरंग त ल्यायो तर, उहाँले मलाई प्रधानमन्त्री बनाउने कुरा गर्नु भएको होइन, आफ्नै पार्टीको महिलाका लागि होलाजस्तो लाग्छ ।’

डा.राणाले आफ्नो पार्टीभित्रको हैसियत आफूलाई थाहा भएको पनि बताइन् । ‘नेपाली कांग्रेस डिसिप्लेनमा चल्ने पार्टी हो’, उनले भनिन्, ‘बाहिरबाट हेर्दा एउटा देखिएला तर, मलाई मेरो पार्टीभित्रको हैसियत कति छ ? मलाई थाहा छ ।’

डा.राणाले भनिन्, ‘प्रधानमन्त्री बन्न संसदीय दलको नेता पनि बन्नुपर्छ । त्यो राम्रो कल्पना हो । प्रधानमन्त्री ओलीजीलाई धेरै–धेरै धन्यवाद दिन चाहन्छु किनकी उनले नेपाली समाजको एउटा राम्रो इम्याजिनेस गर्नु भएको छ ।’

परराष्ट्रमन्त्री एवम् कांग्रेस नेतृ डा.राणाले कांग्रेसको अबको प्रधानमन्त्री शेरबहादुर देउवा नै रहेको बताएकी छिन् । डा.राणाले भनिन्, ‘हाम्रो पार्टीबाट अबको प्रधानमन्त्री पार्टी सभापति शेरबहादुर देउवा नै हो । एमाले र कांग्रेसबीच सहमति नै भएको छ नि । दुई वर्ष ओलीजीले चलाउने ।’

मन्त्री डा.राणाले आफ्नो भारत भ्रमणका क्रममा पश्चिमको महाकाली नदीमा दुईवटा पक्की पुल निर्माण गर्नेबारे छलफल भएको बताएकी छिन् ।
‘बैतडीको झुलाघाट र डेडेल्धुराको परसुराममा पक्की पुलका लागि मोदी जिलाई भनेको छु’, डा.राणाले भनिन्, ‘उहाँले आफ्नो उत्तराखण्ड राज्यको सरकारसँग कुरा गर्छु भन्नुभएको छ ।’

परराष्ट्रमन्त्री डा.राणाले कैलालीको गेटामा उपकरणका लागि बजेटमा पुनरावलोकन हुने बताएकी छिन् । उनले भनिन्, ‘कैलालीको गेटामा बनिरहेको मेडिकल कलेजको पूर्वाधार बनिसकेको छ । डाक्टरहरूको टोली आएर बजेट कम भयो पनि भन्नुभएको छ । उपकरणहरूका लागि यसपालिको बजेटमा पुनरावलोकन गरिनुपर्छ,म त्यसमा प्रयास गर्नेछ ।’

उनले देशमा संकट पर्दा एमाले र कांग्रेस मिलेको इतिहास रहेको बताइन् । ‘देशमा जबजब संकट आउँछ, तबतब कांग्रेस र एमाले मिलेर देशलाई अगाडि बढाउँछन्, चाहे त्यो जनआन्दोनका बेला होस्, चाहे शान्ति प्रक्रियाका बेला होस् ।’

परराष्ट्रमन्त्री डा.राणा बुधबार गौरा बिसर्जनका लागि धनगढी आएकी हुन् । डा.राणाले बुधबार नै गौरा माताको पुजन गरि बिसर्जन गरिसकेकी छिन् ।