काठमाडौं । सहकारीको करोडौं रकम अपचलन र ठगी गरेको अभियोग लागेका राष्ट्रिय स्वतन्त्र पार्टी (रास्वपा)का सभापति एवं पूर्व गृहमन्त्री रवि लामिछानेलाई संसदीय छानविन समितिले बयानका लागि बोलाएको छ ।

सहकारी संस्था बचत रकम दुरूपयोग सम्बन्धमा गठित संसदीय छानबिन विशेष समितिले सभापति लामिछानेलाई बयानका लागि बोलाएको हो । लामिछानेलाई सोधपुछका लागि शुक्रबार २ बजे बोलाइएको समितिका सभापति सूर्यबहादुर थापाले जानकारी दिएका छन् ।

सभापति लामिछानेलाई गोरखा मिडिया नेटवर्क प्रालिका प्रबन्ध निर्देशकको हैसियतमा सोधपुछका लागि बोलाइएको संयोजक थापाले बताएका छन् ।

विभिन्न सहकारीको रकम गोरखा मिडिया नेटवर्कमा कम्पनीका तत्कालीन पदाधिकारीहरूको खातामार्फत् गएको देखिएपछि समितिले उनीहरूलाई बोलाएर सोधपुछ गरिरहेको छ ।

गोरखा मिडिया प्रालिका क्रियटिभ डाइरेक्टर तथा नोबडी प्रोडक्सन प्रालिका सञ्चालकसमेत रहेका रास्वपाका सहमहामन्त्री विपीनकुमार आचार्यसँग सोधपुछ भएको थियो ।

बिहीबार नै तत्कालीन हर्बो इन्टरनेशनल प्रबन्ध निर्देशक एवं हाम्रो ग्रुप अफ कम्पनीका संस्थापक अध्यक्ष पुष्पराज पौडेलसँग पनि सोधपुछ गरिएको थापाले बताएका छन् ।

लामिछाने र गितेन्द्रबाबु राई (जीबी राई)ले सहकारीको करोडौं रकम अपचलन र ठगी गरेको अभियोग छ । लामिछाने र राई पार्टनर बनेर गोर्खा मिडिया नेटवर्क प्रालिमार्फत ग्यालेक्सी फोरके नाम गरेको टेलिभिजन खोलेका थिए ।

सहकारी डुबेपछि राई फरार छन् । लामिछाने भने पार्टी खोलेर सहकारीको करम अपचलन र ठगीबारे मलाई थाहा छैन भनेर राजनीतिक संरक्षणमा बसेका छन् ।