काठमाडौं । नेपाली कांग्रेसका महामन्त्री गगनकुमार थापालाई भेट्न सरकारी गाडीमा आएका कार्यकर्ताका कारण जेब्राक्रसबाट हिँड्ने पैदल यात्रुलाई निकै कठिनाइ भएको छ ।

आइतबार बिहान करीव ८ बजे काठमाडौंको रातोपुल, ज्ञानेश्वर नजिकै मूल सडकमा थापाका समर्थकले राखेको बा २ झ ३७२७ नम्बरको सरकारी स्कार्पियो गाडीले पैदल यात्रुलाई निकै सास्ती दिएको हो ।

यो सरकारी गाडीबाट उत्रिएर समर्थक/कार्यकर्ताहरू थापालाई भेट्न उनको घरमा छिरेका थिए । गाडीले करीव ३ घण्टासम्म सडकमा पैदल यात्रुलाई जेब्रा क्रसमा अबरोध गरेर हैरान बनाएको थियो ।

महामन्त्री थापाका समर्थक (कार्यकर्ता) चढेको सरकारी गाडी कुन कार्यालयको हो खुल्न सकेको छैन । तर, बिहानै थापालाई भेट्न आएका कार्यकर्ताले सरकारी नम्बर प्लेटको गाडी महामन्त्री थापाको निवास नजिकैको मूल सडकमा राखेर पैदल यात्रुलाई दु:ख दिएपछि स्थानीयले आक्रोश पोखेका छन् ।

विधि र पद्धतिको कुरा गर्ने कांग्रेसका महामन्त्री थापाका कार्यकर्ताले सरकारी गाडी दुरुपयोग गरे पनि हुन्छ । पैदल यात्रुलाई हिँड्न अबरोध गर्दा पनि हुन्छ । जेब्रा क्रसलाई अबरोध हुने गरेर सरकारी गाडी राख्दा पनि हुन्छ ।

थापा सत्तारुढा नेपाली कांग्रेसका महामन्त्री हुन् । थापाले कानूनको उल्लंघन गरे पनि छुट होला ! सरकारी गाडी दुरुपयोग गर्ने कार्यकर्तालाई थापाले कारबाही गर्छन् वा गर्दैनन् हेर्न बाँकी छ ।