कृष्णनगर । नेपाली कांग्रेसका केन्द्रीय सदस्य एवम् प्रतिनिधि सभाका सांसद अभिषेकप्रताप शाहले भारतको उत्तरप्रदेशका मुख्यमन्त्री योगी आदित्यनाथसँग भेटवार्ता गरेका छन् ।

कांग्रेस नेता शाहले बुधबार लखनउमा मुख्यमन्त्री आदित्यनाथलाई भेट गरेका हुन् । भेटमा नेपाल–भारतको सिमानामा देखिएको समस्या, दुई मुलुकबीचको सम्बन्धलगायतका विषयमा कुराकानी भएको नेता शाहले जानकारी दिए ।

कांग्रेसका केन्द्रीय सदस्य शाहले उत्तरप्रदेशका मुख्यमन्त्री आदित्यनाथलाई नेपाल भ्रमणको निम्तो पनि दिएका छन् । जवाफमा मुख्यमन्त्री आदित्यनाथले कोरोनाभाइरसको संक्रमण सहज हुनेवित्तिकै नेपाल भ्रमणमा आउने आश्वासन दिएका छन् ।

भ्रमणका बेला पशुपतिनाथको मन्दिरको दर्शन गर्ने इच्छा मुख्यमन्त्री आदित्यनाथले देखाएको कांग्रेस नेता शाहले जानकारी दिए ।

नेपाल र उत्तरप्रदेशबीच लामो सिमाना जोडिएको छ । सिमानामा नेपालीहरूलाई विभिन्न समस्या हुने गरेको छ । ती समस्या समाधानमा ध्यान दिन नेता शाहले आदित्यनाथसँग अनुरोध गरेका छन् ।

कांग्रेस नेता शाहले नेपाली नम्बर प्लेटका गाडीहरूलाई भारतमा पनि चल्न दिनुपर्ने माग राख्दै आएका छन् । सो विषयमा पनि उनले बेलाबेला सम्बन्धित निकायमा आग्रह गर्दै आएका छन् ।