तुलसीपुर १३ मा कांग्रेसको राम्रो काम ‘अरिँगालहरू’लाई मन परेन
तुलसीपुर । तुलसीपुर उप–महानगरपालिका वडा नम्वर १३ मा लगाएको ताला २४ घण्टाभित्र नखोलिए उप–महानगरपालिकामा तालाबन्दी गर्ने वडाध्यक्षहरूले चेतावनी दिएका छन् ।
१० जना वडाध्यक्षहरूले सत्तारुढ नेपाल कम्युनिस्ट पार्टी (नेकपा) निकटका मेयर घनश्याम पाण्डेलाई २४ घण्टाभित्र ताला खोल्न चेतावनी दिएका हुन् ।
सोमबार बिहान तुलसीपुरमा भेला भएका १० वटा वडाका वडाध्यक्षहरूले वडा नम्वर १३ को वडा कार्यालयमा लगाएको ताला वार्ताको माध्यमबाट समाधान गर्न आह्वान गरेका छन् ।
मेयरसंग वार्ता र सम्वाद गर्न वडा नम्वर ७ का वडाध्यक्ष टोपबहादुर केसीको संयोजकत्वमा वार्ता समिति पनि गठन गरिएको छ ।
समितिमा वडा नम्वर ९ का वडाध्यक्ष घनश्याम ढकाल र वडा नम्वर १० का वडाध्यक्ष कुमार लामिछाने सदस्य रहेको वडा नम्वर १३ का वडाध्यक्ष डम्वरबहादुर न्यौपानेले जानकारी दिए ।
आइतबार नेकपाका स्थानीय नेताहरूको नेतृत्वमा वडा कार्यालयमा ताला लगाइएको थियो । नेकपाका नेताहरूले ताला लगाएपछि सेवाग्राहीहरू मर्कामा परेका छन् ।
सडक निर्माणका लागि उपभोक्ता समिति गठनमा नेकपाको भागभण्डा हुनुपर्ने माग गर्दै आइतबार कम्युनिस्टहरूले तालाबन्दी गरेका थिए ।
गत असारमा गठन भएको उपभोक्ता समितिले तुलसीपुर उपमहानगरपालिकासँग योजना सम्झौताका लागि प्रक्रिया अगाडि बढाउँदा आलटाल गरेको र नेकपाले यसको फाइदा लिँदै तालबन्दी गरेको आरोप छ ।
स्थानीय तहको निर्वाचनमा तुलसीपुर उपमहानगरपालिका वडा नम्वर १३ मा नेपाली कांग्रेसबाट उम्मेदावरी दिएका वडाध्यक्ष र ४ जना वडा सदस्यहरू निर्वाचित भएका थिए ।
फेसबुकबाट तपाईको प्रतिक्रिया