काठमाडौं । कञ्चनपुरकी १३ वर्षीया बालिका निर्मला पन्तका बलात्कारी र हत्याराहरूलाई कारबाहीको माग गर्दै नेपाली कांग्रेसका नेताहरूले राजधानीमा दवाव दिएका छन् ।

नेपाली कांग्रेसका नेता रमेश लेखकका अनुसार प्रधानमन्त्री केपी ओली र नेकपाका दोस्रो तहका अध्यक्ष पुष्पकमल दाहाल प्रचण्डसँग भेटेर निर्मला पन्तका दोषीहरूलाई कारबाही गर्न दवाव दिइएको हो ।

शनिबार प्रधानमन्त्री ओलीसँगको भेटमा आफूहरूले दोषीहरूलाई कारबाहीका लागि दवाव दिएको कांग्रेस नेता लेखकले जानकारी दिए ।

‘निर्मला पन्त मात्रै होइन सबै बालिका र चेलीका बलत्कारीहरू तथा हत्याराहरूलाई छिटो पक्राउ गरेर कारबाही होस् भनेर माग गरेका छौँ’, उनले भने, ‘प्रधानमन्त्रीले पनि यस विषयमा आफू गम्भीर छु भन्नुभएको छ ।’

कम्युनिस्ट सरकारले सत्ता सम्हालेसँग देशमा शान्ति सुरक्षा दिनप्रति दिन विग्रर्दै गएको भन्दै कांग्रेस नेता लेखकले अपराधीहरूलाई संरक्षण गर्नेहरू सत्तापक्षकै रहेको बताए ।

निर्मला पन्तसहितका बलात्कृतहरूका दोषी तथा हत्याहरू खुलेआम हिड्न थालेपछि कांग्रेसका नेताहरूले पक्राउ गरेर कारबाहीका लागि दवाव दिन सत्तापक्षका नेताहरूसँग भेट गरेर गम्भीर बन्न आग्रह गरेका हुन् ।