काठमाडौं । पूर्वसांसद गंगा सत्गौवा थारुले संविधानले थारु कलास्टरमा पहिचान दिएपछि पनि थारुहरूको पहिचान र आउने सन्ततीहरूको अधिकारमाथि खेलवाड भइरहेको बताएकी छिन् ।

काठमाडौंमा सोमबार आयोजित कार्यक्रममा उनले भनेकी छिन्, ‘हामी पटक–पटक राज्यबाट शोषण र दमनमा परिरह्यौं । आजफेरि पनि हाम्रो पढेलेखेका य्ुवाहरूको गास, बास, कपास खोस्ने दुष्प्रयासका साथ यो विधेयक सुनियोजित तरिकाले आएको हामीलाई महसुश भएको छ ।’

उनले भनिन्, ‘यसप्रति हाम्रो सिंगो थारु समुदायको ध्यानाकार्षण भएको छ । सिंगो हाम्रो थारु समुदायले मन्त्रिपरिषदले गरेको निर्णयप्रति खेद प्रकट गरेको छ ।’

हिजोका दिनमा थारुहरू राज्यमन्त्री मात्रै बनेको दाबी गर्दै उनले आज थारु समुदायबाट दुई जना क्याविनेटमा प्रतिनिधित्व हुँदा पनि तिनीहरूले पदभन्दा ठूलो पहिचान होइन भन्ने कुरा पुष्टि गरेको बताइन् ।

अहिलेको क्याविनेटमा थारु समुदायबाट अमनलाल मोदी र रञ्जिता श्रेष्ठ मन्त्री छन् ।

थारु समुदायमाथि संविधान विपरित फेरि अन्याय भएको खण्डमा २०७२ भदौ ७ गतेको जस्तै आन्दोलन व्यूँताउने उनको चेतावनी छ ।

‘अब हामी थारु चुप लागेर बस्दैनौं । फेरि पनि हामी माथि यस्तो अन्याय पर्न गयो भने फेरि पनि २०७२ भदौ ७ गतेको जस्तो आन्दोलन उठाउन नपरोस् । यो कुरा राज्यसत्ताले बुझोस्’, उनले भनिन् ।