काठमाडौं । उदयपुर र ओखलढुंगा जिल्लामा आगलागी हुँदा धनमाल जलेर लाखौँको क्षति भएको छ ।

उदयपुरको उदयपुरगढी गाउँपालिका–७ हाडेवास बस्ने चोकबहादुर मगरको घरमा विद्युत सर्ट भई बिहीबार बिहान आगलागी भएको छ ।

आगलागी हुँदा मगरको घर, उनको सरस्वती फूलवारी पशुपालन कृषि फर्म र उनका भाइ चित्रबहादुर मगरको गोठमा समेत जलेर क्षति भएको छ ।

आगलागी हुँदा सुनचाँदी, नगद ९० हजार रूपियाँ लगायतका सामान जलेर करिब २५ लाख ८२ हजार रूपियाँ बराबरको धनमाल नष्ट भएको छ ।

ओखलढुङ्गाको चिसंखुगढी गाउँपालिका–४ रातमाटे बस्ने ७० वर्षीय कुमार राईको घरमा बिहीबार बिहान आगलागी भएको छ ।

राईको घरमा रहेको नगद ५ लाख रूपियाँ, सुन तथा चाँदीका गहना, अन्नपात, लत्ताकपडा लगायतका सामान जलेर करिब १२ लाख रुपियाँ बराबरको धनमाल नष्ट भएको प्रहरीद्वारा जारी विज्ञप्तिमा उल्लेख छ ।

प्रहरीले स्थानीय बासिन्दा र दमकलको सहयोगमा आगलागी नियन्त्रणमा लिएका छन् ।