एआइजीपी थापा काममा फर्कन तयार, आईजीपी सिंहलाई सहयोग गर्ने

काठमाडौं । नेपाल प्रहरीको महानिरीक्षकमा धिरजप्रताप सिंहलाई नियुक्त गरेपछि असन्तुष्ट बनेका प्रहरी अतिरिक्त महानिरीक्षक सहकुलबहादुर थापा बुधबारबाट काममा फर्कन सहमत भएका छन् ।

सोमबार साँझ गृह मन्त्रालयमा गृहमन्त्री बालकृष्ण खाण र गृहसचिव टेकनारायण पाण्डेलाई भेटेर एआईजी थापाले आफू बुधबारबाट काममा फर्कने जानकारी गराएका हुन् ।

‘म बुधबारबाट संगठनको पूर्ववत काममा फर्कन्छु’, अतिरिक्त महानिरीक्षक थापाले भने, ‘मंगलबार सरकारी बिदा छ । बुधबार हाजिर गरेर काम सम्हाल्छु ।’

उनी प्रहरीको कार्य विभाग प्रमुख रहेका छन् । कार्य विभाग प्रमुख निर्वाचन हेर्ने प्रमुख भएकाले उनले नै प्रहरीको स्थानीय निर्वाचनको प्रमुख भएर काम गरिरहेका छन् ।

एआईजी थापाले नवनियुक्त धिरजप्रताप सिंहलाई सहयोग गर्ने आश्वासन गृहमन्त्री खाणलाई दिएको प्रेस नोटमा उल्लेख छ ।

Published : Monday, 2022 May 2, 9:21 pm