बुटवल । गृहमन्त्री समेत रहेका नेपाली कांग्रेसका नेता बालकृष्ण खाणले गठबन्धनको निर्णय नमान्ने र असहयोग गर्ने कांग्रेसका नेता कार्यकर्तालाई कारबाहीको चेतावनी दिएका छन् ।

गृहजिल्ला रुपन्देहीमा बुधबार पत्रकारहरूसँग कुरा गर्दै उनले गठबन्धनका दलहरूबीच भएको सहमति कार्यान्वयन नगरिए पार्टीले कारबाही गर्ने बताए ।

खाणले गठबन्धनको सहमतिको विरोध गर्ने नेताले प्रदेश र संघीय निर्वाचनको टिकट नपाउने र कार्यकर्तालाई हैसियतअनुसारको कारबाही हुने बताएका छन् ।

गठबन्धनमा भएको सहमति पूर्ण रुपमा पालना गरेर जान नेता कार्यकर्तालाई खाणले निर्देशन दिएका छन् ।

उनले गठबन्धनको सहमतिपूर्ण रुपमा कार्यान्वयन गर्ने दायित्व कांग्रेसकै भएको बताएका छन् ।

‘अहिले विरोध गर्ने र सहमति एवं निर्णय कार्यान्वयन नगर्ने नेताले प्रदेश र संघीय निर्वाचनको टिकट नपाउन सक्छन्’, उनले भने, ‘अन्य कार्यकर्तालाई पनि हैसियतअनुसारको कारबाही हुन्छ ।’

उनले सबै कार्यकर्तालाई गठबन्धनमा मित्रवत् व्यवहार गरेर सहमतिका साथ अघि बढ्न पनि निर्देशन दिएका छन् ।