‘अघोषित’ ५२ वर्षीय बेहुलाले महिलाकै ४२ लाख भ्याइदिए

काठमाडौं । महानगरीय प्रहरी अपराध महाशाखाले विवाहको प्रलोभन देखाइ ४२ लाखभन्दा धेरै रकम ठगी गर्ने ‘अघोषित पति’लाई काठमाडौंको विशालनगरबाट पक्राउ गरेको छ ।

रामेछापको साँघुटार नगरपालिका–३ घर भइ हाल धापासी बस्दै आएका ५२ वर्षीय लोकबहादुर श्रेष्ठ ‘नवीन’लाई महाशाखाको टोलीले आइतबार पक्राउ गरेको विज्ञप्तिमार्फत जनाएको छ ।

श्रेष्ठले ती महिलासँग विवाह गर्ने प्रलोभन देखाई करीव ४२ लाख ३४ हजार रूपियाँ ठगी गरेको प्रहरीले जनाएको छ ।

श्रेष्ठले ती महिलालाई विश्वासमा पारी बिरामी भएको भनेर उपचार र झारफुक गर्ने बहाना बनाएर रकम लिएको महिलाको उजुरीमा उल्लेख छ ।

ती महिलाले श्रेष्ठलाई आइएमई तथा सिटीएक्सप्रेसमार्फत पटक–पटक गरी रकम पठाउन लगाएको विज्ञप्तिमा उल्लेख छ ।

श्रेष्ठलाई ठगी कसुरअन्तर्गत थप अनुसन्धानका लागि महानगरी प्रहरी परिसर काठमाडौं पठाइएको छ ।

Published : Tuesday, 2022 April 5, 12:55 pm