काठमाडौं । नेपाली कांग्रेसले केन्द्रीय सदस्य मञ्जु खाणलाई धनुषा जिल्लामा केन्द्रीय प्रतिनिधि तोकेर पठाएको छ ।

कांग्रेस सभापति शेरबहादुर देउवाको हस्ताक्षर रहेको पत्रमा नेतृ खाणलाई ‘घर–घर जाऔं, कांग्रेस जिताऔं’ अभियानको उदेश्यलाई सफल बनाउन निर्देशन दिइएको छ ।

कांग्रेसलाई आगामी निर्वाचनमा जिताउन यो अभियानको थालनी गरिएको छ । कांग्रेसले फागुन २९ देखि वैशाख ३ गतेसम्म एक महिना अभियान सञ्चालन गर्नेछ ।

धनुषा जिल्लाको प्रतिनिधि सभा क्षेत्र, प्रदेश सभा क्षेत्र, पालिका र वडा कार्यसमिति लगायत पार्टीका सबै तह, भ्रातृ एवम् शुभेच्छुक संस्थालाई थप गतिशील र सक्रिय बनाउन नेतृ खाणलाई निर्देशन दिइएको छ ।

यसैबीच, सभापति एवम् प्रधानमन्त्री देउवाले नेतृ खाणलाई केन्द्रीय सदस्यमा निर्वाचन भएकोमा शुभकामना पनि दिएका छन् ।

‘नेपाली कांग्रेसको चौधौं महाधिवेशनबाट पार्टी केन्द्रीय कार्यसमितिको सदस्य जस्तो गरिमामय पदमा निर्वाचित हुनु भएकोमा पुनः हार्दिक बधाई प्रकट गर्दछु’, देउवाले भनेका छन् ।