धनगढी । नेपाली कांग्रेस कैलालीको सभापतिमा नारायण भट्ट विजयी भएका छन् ।

बिहीबार सार्वजनिक भएको अन्तिम नतिजाअनुसार भट्ट सभापतिमा विजयी भएका हुन् । भट्टसँग सभापतिमा प्रतिस्पर्धा गरेका प्रकाशबहादुर बम पराजित भएका छन् ।

भट्टले बमलाई २ सय ६३ मतको अन्तरले पराजित गरेका हुन् । सभापतिमा निर्वाचित भएका भट्ट सभापति शेरबहादुर निकटका हुन् । पराजित भएका बम पनि देउवा निकटकै हुन् ।

सभापतिमा निर्वाचिन भट्टले एक हजार ३५९ मत पाएका छन् । पराजित भएका बमले एक हजार ९६ मत पाएका छन् ।

दोस्रो चरणमा भएको निर्वाचनमा उनी विजयी भएको निर्वाचन समितिले जनाएको छ ।

पहिलो चरणमा कसैले पनि ५० प्रतिशत मत कटाउन नसकेपछि बिहीबार दोस्रो चरणको मतदान भएको थियो ।

पहिलो चरणमा सभापतिमा प्रकाशबहादुर बमले १ हजार १६९ मत पाएका थिए । सभापतिका अर्का उम्मेदवार नारायणदत्त भट्टले १ हजार ७२ मत पाएका थिए ।

शेखर कोइराला समर्थक सभापतिका उम्मेदवार रामबहादुर कलेलले १९७ मत पाएका थिए । दोस्रो चरणको मतदानमा कलेलले बमलाई समर्थन गरेका थिए । कैलालीमा शेखर कोइराला समूहको पत्तासाफ भएको छ ।

पार्टीको आन्तरिक निर्वाचनमा जमानत जफत हुने व्यवस्था छैन । तर, शेखरका सभापतिका उम्मेदवार कलेलले ल्याएको भोट निकै कम भएपछि जमानत जफत भएको भनेर कैलालीमा चर्चा भएको छ ।